Олоҥхо уонна хомус декадата

Сэтинньи 30 күнүгэр, Сахабыт Сиригэр аар-саарга аатырбыт, суон сураҕырбыт, дьүрүһүйэр дорҕооннору көтүтэр Хомус күнэ бэлиэтэннэ. Бу бэлиэ күн Олонхо, хомус декадатын Суотту нэһилиэгэр Суоттутааҕы модельнай библиотека киинигэр библиотекарь СР культуратын туйгуна Р.Н.Черкашина иилээн-саҕалаан ыытта. Суотту орто оскуолатын 6 кылааһын үөрэнээччилэрэ — В.П.Свинобоев аатынан народнай театр иһинэн «Уһуйчаана» студия оҕолоро С.Васильев-Борогонскай «Мөҥүрүүр бөҕө» олонхотун, С.Васильев -Боргонскай аатынан сүрүн оскуола сад «Чуораанчык» иитиллээччилэрэ «Эрчимэн Бэргэн» олонхону ааҕыылара, Суоттутааҕы муусука уонна искусство оскуолатын үөрэнэччилэрин олонхо тематыгар уруһуйдара турда, салайааччы СР норуотун маастара Е.Я.Портнягина үөрэнээччилэрин уруһуйун, ситиһиилэрин кэпсээн ситэрдэ. Кырачаан дьоммут норуот ырыатын, чыыбы — чаабы чабырҕаҕы, олонхону, төрүт дорҕоон диэни сэргииллэрэ, сэҥээрэллэрэ илэ көстөрүттэн астынныбыт, инникилээх эбиппит диэн үөрдүбүт. Саха тылын учууталларын 2 съеһин кыттыылааҕа, «Чуораанчык» уһуйаан иитээччитэ С.П.Федорова оҕолору бэлэмнээн аҕалан сэргэх нүөмэрдэри көрдөрдө, съезд туһунан сэһэргээтэ. Салҕыы хомус күнүн бэлиэтээн эдэр хомусчуттар: улуус, республика хомуһун күрэҕин лауреата Марфа Татаринова, Республиканскай «Муус устар» ыччаттар хомуска биирдиилээн оонньууларын фестивалын кыттыылааҕа Николай Ордахов уонна өр сылга культураҕа үлэлээбит, культура, сцена ветерана Мария Спиридонова хомуска дьүрүһүтэ оонньоото. Хомус ууһа, биир дойдулаахпыт Николай Бурцев туһунан бүгүн ахтылынна уонна кини оҥорбут хомуһунан оонньоон көрдүбүт, тэрээһин ис хоһоонун истиҥ кэпсэтиинэн, күргүөмүнэн хомус оонньоон, Сахабыт тылын-өһүн, баай культуратын, историятын үөрэтиэҕин, сайыннарыаҕын диэн биир санаалаах түмүктээтибит. Бука бары кыттааччыларбытыгар, тэрээһиммит ыалдьыттарыгар махтанабыт. Саргылаах сарсыҥҥыны салайсыаҕын, кэҥээн-тэнийэн иһиэҕин!